"Kafé me snakkast" er siste skotet av tilbod i Balestrand. Kunstnarane Bjørg Bjøberg og Arthur Adamson omtalar seg sjølve som glade amatørar i kafefaget, men kunstnarparet har likevel kasta seg ut i det. To gonger i veka i vinterhalvåret opnar dei dørene inn til sin nystarta kafé midt i Holmen.

Gode tilbakemeldingar

– Tilbakemeldingane frå gjestene så langt har vore svært positive, seier Bjørg Bjøberg, som førebels kallar det heile eit prøveprosjekt. Ho fortel at god støtte frå kommunen og alle rundt dei gjorde at dei fekk mot til å setja ideen ut i livet.

– Målet er at eit kafebesøk her skal gje noko meir enn berre det å bli mett i magen. Du skal også få med deg opplevingar, seier Adamson.

Kafékultur

På starten av 1900-talet, då turistar og kunstnarar inntok Balestrand for fullt, blomstra det opp kafear nærast rundt kvar sving. Frå Skåsheimselvi til Ese var det 11-12 kafear.

– Me håpar å få tilbake noko av den kafekulturen. Det er viktig for bygda at me har ein plass der me kan møtast, seier duoen.

Når sola varmar meir og dagane vert lysare, vil talet på opningsdagar bli utvida.

– Fram til mai vil me ha ope fredag og laurdag. I sommarhalvåret blir det ope kvar dag, seier Bjørg og Arthur.