– Jerven er problemet, og nemnda prioriterer å ta ut jerv der det var store skader i fjor. Då gjorde jerven størst skade i Leikanger og Suldal. Difor går nemnda for at det vert vurdert ekstra tiltak som å ta ut jerv på dei to stadene, seier Norvall Nøringset, leiar i rovviltnemnda sone 1.

Lisensjakta på jerv varer fram til 15. februar. Førebels er det ikkje kome melding om at det er nokon som har kome på skothald og skote jerv her i fylket. Kvoten under lisensjakta er seks dyr.

Medlemene i rovviltnemnda har hatt møte på Leikanger, der dei drøfta korleis ein kan unngå at rovdyr som jerv kan gjera store skader på beitande sauer også til sommaren.

– Me er i dialog med Direktoratet for naturforvaltning (DN), Statens naturoppsyn (SNO) og miljøverndepartementet. Eg vil følgja nøye med, og vera i kontakt med miljøverndepartementet og direktoratet. Me styrer ikkje DN, men rovviltnemnda ventar at dei set inn dei ressursar som må til. Når lisensjakta er slutt i mars, må me sjå nærare på kva som skal gjerast. Då er det òg aktuelt å ta kontakt med statssekretæren i departementet, seier SV-politikaren, som tykkjer det er kjedeleg at ingen har greidd å skyta jerv til no i vinter.