Sogn Regionråd hadde stand på karrieremessa i Oslo måndag. Det var ordførar i Sogndal og regionrådsleiar Jarle Aarvoll, ordførar Torodd Urnes og næringssjef Olav Grov frå Luster som representerte Sogn i Oslo.

180 ungdomar

Det kom om lag 180 ungdomar med røter frå eller interesse for Sogn og Fjordane på messa i Oslo. Det var òg mange frå Sogn, opplyser Olav Grov.

– Dei som vitja messa, har litt ulikt utgangspunkt. Somme er nett i gang med ei høgare utdanning, andre er nesten ferdige, medan nokre er i sin fyrste jobb etter fullførd utdanning. Ein del er konkret på utkik etter arbeid i heimfylket og vurderer seriøst å flytte heim, medan andre har eit noko meir langsiktig perspektiv på det. Inntrykket er at dei som kjem på arrangementet tykkjer det er fint at heimfylket «bryr seg», seier han.

Standen til Sogn Regionråd var lokalisert tett inntil tunge offentlege verksemder i regionen vår som er i vekst: Difi, Statens vegvesen, Høgskulen og Vestlandsforsking.

– Dette er arbeidsgjevarar som er interessante for mange med høgare utdanning.

Talkshow

Både private bedrifter og sentrale offentlege verksemder var representerte på standane. Det var også mange andre å treffa: ordførarar, fylkesordførar, stortingsrepresentant frå fylket og kommunalministeren.

På programmet stod eit talkshow der mogelegheiter i fylket var i søkjelyset, og etterpå var det god mat.

– Det er tredje året eg har vore på messa i Oslo, og eg veit at fleire eg har møtt på stand dei to førre åra, no har flytt heim eller er på veg til å flytta heim, seier Olav Grov.

På karrieremessene i Trondheim 11. februar og i Bergen 16. februar vil også Sogn stilla med felles stand, då med representantar frå andre kommunar.