182 dyr vart funne i reinteljinga i Vest-Jotunheimen. Stamma har sidan 2003 vorte mindre og mindre, veksten i fjor er marginal, men gledeleg. Det er villreinutvalet for Vest-Jotunheimen som stod for teljinga utført 17. desember i fjor.

Truleg alle dyra

Det vart leita gjennom heile villreinområdet frå Kvarven og innover halvøya til Gravdalen og Austabotn, vidare frå Berdalen til Sognefjellet og Keisarpasset.

«Det er rimeleg god grunn til å rekna med at alle dyra i stammen vart med under teljinga, men det er ikkje råd å vera heilt sikker», skriv fjelloppsynsmann Einar Fortun i rapporten.

Storflokken inneheldt 123 simler og ungdyr, 29 kalvar og 11 bukkar. I tillegg var det 19 bukkar i ein flokk på Berdalsfjellet.

Ikkje jakt

Flokken har auka med 12 dyr sidan teljinga i november 2008. I kalveteljinga september 2009 vart 49 kalvar registrert.

«Med sopass god kalvetilvekst, hadde ein forventa at stammen hadde vakse noko meir. Dei siste tre åra har det ikkje vore jakt i villreinområdet», rapporterer Fortun.

Villreinstamma i Vest-Jotunheimen var i 2003 på 397 dyr.

Einar Fortun skriv at nedgangen måtte snuast for å berga stamma, men veksten skulle gjerne vore større på bakgrunn av kalveteljinga sist sommar.