Torbjørn Hasund og Terje Eggum tok på seg shorts og freista badelukka i Sognefjorden torsdag kveld. På land var temperaturen 14 minus, og i vatnet var det 3,5 pluss! Dei to var ute i fjorden i eitt minutt, noko som er eit krav dei har sett for at de skal definerast som eit ekte vinterbad.

– Det er faktisk slik, at dess kaldare det er i lufta, dess meir behageleg er det faktisk å koma seg ut i fjorden. Men når ein kjem opp att på land, må turen til ein varm dusj vere kort, fortel hardhausane til Sogn Avis.

Saman med andre frå Sogn Fjordsymjarklubb gjer dei to seg no klare for VM i vintersymjing som skal gå av stabelen i Bled i Slovenia frå 22. til 24. januar. Der skal kring 700 deltakarar frå 20 land konkurrere i ulike symjegreiner, i bitande kaldt vatn.

For Eggum, Hasund og fleire andre lokale hardhausar byrjar badesesongen kring 1. desember. Med badeshorts og lue har dei ingen problem med at temperaturane er langt under det dei aller fleste vil definere som badevenleg.

– Vi skal vel ikkje påstå at dette er ein direkte varm aktivitet, men det er moro, forsikrar dei to fjordsymjarane som ikkje vil kommentere korleis veslekaren blir etter eit minutt i bitande kaldt vatn...