Gjekk ved sida av rasvollen

– Det var ei geologisk vurdering som avgjorde kor lang me skulle bygga rasvollen, seier leiar Jan Roy Dalheim i kommunaltekniske tenester i Årdal.

Rasvollen stod ferdig ved årtusenskiftet, og vart bygd nettopp for å ta slike ras som kom ned frå om lag 300 meter oppe i den bratte fjellsida. Ei svær blokk har losna, men vart knust i mindre delar på veg nedover.

Rasutsett

Dalheim seier dei hadde ei risikoanalyse før vollen vart bygd og at det ikkje var økonomien som stogga ein lengre rasvoll.

– Dette vil alltid bli ei avveging i høve til kor sannsynleg det er at eit ras vil gå i eit bestemt område. Avstanden til fjellfoten og terrenget elles vil også vera avgjerande. Men heilt sikker kan du aldri bli. Det står også i ein geologisk rapport frå 50-talet at det aller meste av busetnaden i Årdal er rasutsett. Så neste gong kan det koma ras andre stader i bygda. Me bur på Vestlandet, og då må me rekna med noko slikt i ny og ne, seier han.

Årdal kommune skal seinare i dag ha møte med dei evakuerte for å få ei vurdering på kva som skal gjerast vidare.

– Det er ei vanskeleg sak, uansett, seier Dalheim.