Måndag 23. november er det endeleg klart for sleppfest for debutalbumet til The Generous Days.

Det har fått namnet "These are The Generous Days", og bandet inviterer til gratis sleppfest på rockeklubben Mono i Oslo. Der vil dei framføra låtar frå den nye plata, selja plater – med valfri signatur – og nytrykte t-skjorter.

På festival

Sommaren 2008 kom EP-en "Fireworks", og sidan då har bandet spelt mange konsertar og på fleire festivalar rundt omkring. Mellom anna var dei ein del av Underwood-programmet på Norwegian Wood i Frognerparken i juni.

Slik har publikum alt fått høyra fleire av låtane på den nye plata, blant anna allsongfavoritten "Carolina", med det lett gjenkjennelege na-na-na-refrenget.

Eige plateselskap

Plata vert utgjeven på eige plateselskap, Generous Days Records, med distribusjon gjennom Musikkoperatørene, som er den største av dei uavhengige distributørane i Noreg.

På nyåret planlegg bandet òg ein nasjonal sleppturné med sognadialektrockebandet Tyyl!.

The Generous Days er samansett av Erik Grov frå Jostedalen, Eirik Kristensen frå Hornindal, Per Christian Grov frå Borgund og Gunnar Husabø frå Leikanger.