Stort løft for liten kino

Kinoane i Noreg står framfor ei revolusjonerande digitalisering.

Kinoen i Balestrand treng økonomisk stønad til å finansiera utbetringane i forkant av digitaliseringa og i neste omgang ta sin del av den store omlegginga. Dei reelle utgiftene til basispakken for kvar kinosal blir stipulert til i overkant av ein million kroner.

Det statlege filmfondet skal betala 40 prosent av kostnadene med digitaliseringa, filmdistributørane skal bidra med 40 prosent og kinoane må dekkja resten.

Samrøystes

For Friberg kino sin del vil det vera snakk om ein kostnad på totalt 300–400.000 kroner. Dei har no søkt kommunen ein lånegaranti.

Måndag handsama formannskapet saka, og dei tilrår samrøystes at kommunen stiller kommunal garanti for lån på 300.000 kroner. Garantien skal vara i ti år.

– Digitalisering av «dugnadskinoen» Friberg kino er eit stort løft. Det synest rimeleg at Balestrand kommune yter bistand i form av ein lånegaranti slik at kinoen vert i stand til å gjennomføra dette løftet. Dette sikrar kinodrift i Balestrand også i framtida, med betre utstyr og betre opplevingar, skriv rådmannen i si vurdering.

Endeleg vedtak i saka blir gjort i kommunestyret.