Det var under den årlege Siderfestivalen i Øystese at kåringa fann stad. Heile 21 produkt var med i konkurransen, elleve av dei frå Sogn og ti frå Hardanger.

Gildast av dei alle etterpå var nok Ingebjørg Heiberg ved Amble gård på Kaupanger, som stakk av med både første- og andreplass. Gullmedaljen gjekk til den økologiske juicen laga på eplesorten Discovery, medan sølvet gjekk til jusen som er laga av økologiske Idunn-eple.

Eplemost

– Kjempemoro, rett og slett, ein kan vel ikkje seia anna. Det er sjølvsagt veldig moro å koma så høgt opp i konkurranse mot store produsentar som til dømes Lerum, men no er det jo ikkje slik at me konkurrerer. Me driv i ein heilt annan skala, men det er verkeleg kjekt å sjå at me har god kvalitet samanlika med dei store, så som Lerum og Balholm, seier Heiberg.

Ho føretrekkjer å kalla det eplemost framfor jus.

– Omgrep som jus og most blir kanskje brukt litt om kvarandre, men det siste er kanskje litt meir gammaldags. Me brukar i alle fall å seia at me produserer most her hjå oss, seier Heiberg, som byrja produksjonen då ho la om til økologisk frukthage for seks år sidan.

Sidan då har ho, med litt slingringsmonn, produsert nokon tusen liter i året.

Lerum på tredjeplass

Saftgiganten Lerum kom på tredjeplass i konkurransen, bak småskalaprodusenten frå Kaupanger, men depper ikkje av den grunn.

– Me er veldig nøgd med å komma så høgt opp i ei kåring med så mange deltakarar og gratulerer sjølvsagt Ingebjørg Heiberg og Amble med ei kjemperesultat, seier kvalitetsdirektør for forsking og utvikling ved Lerum, Merete Lunde.