Til topps på Cho Oyo

Sogndølene Steinar Nes og Henrik Langeland er med på ekspedisjonen som i desse dagar har klatra til topps på Cho Oyo – verdas sjette høgaste fjell.

Måndag føremiddag nådde Nes toppen saman med ekspedisjonskamerat Tor Arne Løvoll, etter å ha gått heile natta. Langeland var med eit stykke oppover, men måtte avbryta toppforsøket, då han var blitt snøblind undervegs.

På veg til basecamp

Det fortel Even Krogstad Valseth, som òg var med på ekspedisjonen, men måtte reisa heim tidlegare på grunn av ein lungebetennelse. Dei to sogndølene er no utan for dekningsområde for mobiltelefon.

– Då dei hadde nådd toppen, gjekk dei ned til der dei hadde parkert skia og fekk så med seg Henrik nedatt til ABC-campen. No er dei på veg derifrå og ned til basecamp, seier Krogstad Valseth.

Han fortel vidare at synet til Langeland er på betringens veg, og at karane har flybillett heim til Noreg den 10. oktober.

Cho Oyo ligg 8201 meter over havet og ligg omtrent 30 kilometer nordaust for Mount Everest på grensa mellom Nepal og Kina (Tibet) i Himalaya.