Ber kommunane skjerpa seg

Nyleg fekk kommunalminister Magnhild Kleppa i fanget ein undersøking som Norges Juristforbundet har gjort på eige initiativ, og som avdekte at svært få veit at dei kan få juridisk rådgjeving hjå kommunane.

– Det er alarmerande tal, og det er ille at folk ikkje veit at dei har krav på juridisk rettleiing, seier Kleppa.

– Dette går utover rettstryggleiken til folk, seier Merete Myklebust, prosjektleiar for juristane sin stand på Leikanger.

Vitja Leikanger

Laurdag vitja kommunalministeren juriststanden på Saften. Juristforbundet hadde stand fleire stader over heile landet i samband med juristdagen, og Kleppa var invitert til arrangementet. Sidan Kleppa var på slektsbesøk i Leikanger - ho har ein svoger her - fall valet på standen til juristane i Sogndal-Leikanger.

Kleppa fortel at regjeringa har vore oppteken av gjeldsrådgjevinga, spesielt i finanskriseåret, og legg vekt på at det er viktig med hjelp tidleg. Kommunalministeren har òg hatt møte med Dag Terje Andersen og Forbrukarrådet.

– Me skal setja oss ned saman og sjå kva me kan bidra med, seier Kleppa, som er klar på at kommunane har eit stort ansvar.

– Om dei ikkje kan halda seg med eigen kompetanse, så må dei samarbeida over kommunegrensene. Dei har óg nettsider dei kan leggja ut informasjon på, seier Kleppa.

Må bli betre

Retten gjeld gjeldsrådgjeving, skule og eldreomsorg. Det kan konkret dreia seg om rett til spesialundervisning eller klage på avslag på sjukeheimsplass.

9 av 10 personar seier at deira kommunar er «svært dårleg» eller «dårleg» til å opplysa om at dei tilbyr juridisk rettleiing. Kommunane har plikt til å opplysa om dei juridiske tenestene dei tilbyr innbyggjarane.