Støy-festival vart arrangert på Meieriet førre helg, og rundt 300 løyste billett til konsertane.

Festivalsjef Lasse Bødal fortel at han i og for seg er nøgd med det, men han meiner mange fleire burde ha teke turen.

Variert program

– Eg skulle ønskja det kom meir publikum, først og fremst for banda sin del. Problemet er at folk trur dette er noko anna enn det faktisk er. Dei trur det er ein rein metallfestival og at det er berre skriking, men slik er det ikkje, understrekar Bødal.

Han fortel vidare at blant dei 18 banda på årets festival var det to metallband, elles plasserer han artistane i sjangrar som pop, rock, punk og singer/songwriter.

– Den yngste artisten var berre elleve år, og bandet som opna festivalen fredag er samansett av 12- og 13-åringar og spelar sjølvlaga hardpop, seier festivalsjefen, som håpar å endra folk si oppfatning av festivalen før neste års festival.