– Eit stort fleirtal i formannskapet i Luster går inn for å byggja eit regionalt bade- og symjeanlegg i kommunesenteret Gaupne. For meg og dei andre som utgjer fleirtalet, er dei positive ringverknadene eit slikt anlegg vil få for kommunen, for næringslivet og for nyetablering og tilflytting avgjerande, seier ordførar Torodd Urnes (KrF).

Ikkje rasera

Ordføraren er overtydd om at badet vil gje god folkehelse, og vil vera med på å gje ei positiv og framtidsretta utvikling i ein kommune som har hatt stor nedgang i folketalet dei siste åra.

– Korleis kan politikarane vera så positive og gjera eit slikt vedtak når så mange bygder og privatpersonar protesterer?

– Det spørst kven som har den beste oversikta over dei økonomiske konsekvensane. Mange har stått fram i avisene dei siste vekene og vore skråsikre på meiningane sine. Nokre meiner at ei slik satsing vil øydeleggja alle velferdstilboda i Luster, og i tillegg rasera tilboda innan barnehage, skule, eldreomsorg osv. Noko slikt vil ikkje skje.

– Korleis kan du som ordførar vera sikker på at så ikkje skjer?

– Som politikarar skal me prøva å sjå samanhengen i dei ulike tiltaka. Luster Bad er ei tung investering, men kommunen greier det utan å rasera velferdstilboda. Det er politikarane sin jobb å prioritera mellom ulike tiltak til beste for innbyggjarane. Lista er lagd høgt for velferdstiltak i kommunen vår, me har mykje å gå på samanlikna med andre kommunar.

Folkerøysting

– Korleis stiller du deg til ei folkerøysting?

– Kommunestyret er valde av innbyggjarane. Me er valde til å ha oversikt over økonomistyringa, ta dei naudsynte vala, styra og ta avgjerder i enkle og kompliserte saker, og prioriteringar til beste for innbyggjarane. Eg er for demokrati, men ikkje for aksjonsdemokrati. Det er to år til neste val. Då skal innbyggjarane få seia si meining om kven som får halda fram.

– Rådmannen hadde ei lang liste over tiltak. Formannskapet har kutta mykje av desse tiltaka. Korleis går det i hop?

– Rådmann la fram rikeleg inndekning som politikarane kunne velja imellom. Formannskapet brukte lang tid på debatten og gjekk grundig inn i saka. Eg meiner formannskapet gjorde ein god jobb. Formannskapet reduserte lånebehovet med 20 millionar kroner ved bruk av fondsmidlar (Gullringenmodellen). Redusert lånebehov reduserer kapitalutgiftene. Einskilde budsjettpostar har me talfesta, andre innsparingar og inntekter har me peika på.