Det meiner prosjektleiar Ottar Wiik om turvegen langs elvane Hopra og Vikja i Vika. Han trur på eit første byggesteg neste år.

– Me har fått eit bidrag frå Statkraft som støttar turvegen med 150.000 kroner. Me har også håp om å få tippemidlar i år til den første biten av turvegen, seier Ottar Wiik.

Fem kilometer

Borgstova, Brødrehaugane frå vikingtida, Askealléen i Kålhagen, Tamburhola, Hopperstad stavkyrkje, Hopperstadtunet, Moahaugane, Hove steinkyrkje, Orvedals mølle og tilbake til Vikøyri og strandsitjarmiljøet.

Den fem kilometer lange turvegen er proppa med kulturminne, no skal ein veg med grusdekke knyta kulturminna i hop. Parsellen langs Hopra får òg veglys.

Bru i Kålhagen

Den første etappen på 1.4 kilometer er årets utfordring. Ikkje heile lengda blir ny, eksisterande vegnett som til dømes langs Vik stadion, skal inngå i heilskapen.

– Her er me ved aksen med spesielt tunge kulturminne, seier Ottar Wiik ved Hopra og Hopperstad stavkyrkje i bakgrunnen.

Han har Ola Hopperstad med på laget, grunneigaren seier ja til bygging av ei bru i den markerte svingen i Kålhagen. Brukarane skal kunne ta seg enkelt opp til mellomalderkyrkja og klyngetunet kloss ved.

Promenade

Vikøyri, Granden og strandsitjarmiljøet fyller opp mellom Hopra og Vikja. På sjøsida av riksvegen er tanken å byggja strandpromenade som vil gjera at turvegen blir samanhengande.

Arbeid med turvegar i Vik er ein del av prosjektet Utvikling rundt kulturminne i Vik og er støtta av fylkeskommunen og Kommunal- og regionaldepartementet.