Mobiliserer gamle fans

– Ein ambassadør for Sogndal og Sogn.

Slik karakteriserer Håvard Lægreid trubaduren Olav Stedje. Midt på 90-talet tok han saman med Geir Kåre Resaland, initiativet til danninga til ein fanklubb for den folkekjære artisten.

Klubben blei avvikla etter fem år og hadde då 770 medlemmer.

– Alltid kjempestemning

Lægreid er klar på at alle som likar Olav Stedje sin musikk bør stilla på Syng meg heim-konserten i Kulturhuset søndag. Dei tidlegare fanklubb-leiarane gjer no alt dei kan for å få fylt opp storsalen til konserten.

– Me prøver å få så mange av dei gamle medlemmene som mogeleg til å stilla opp. Eg har opplevd Olav Stedje på scenen både i Sogn og andre stader. Det er alltid kjempestemning. Det skal det bli i Kulturhuset på søndag òg, seier Lægreid.

Ny plate

Forholdet til Olav Stedje sin musikk er sterkt og kjem alltid til å vera det, sjølv om fanklubben er lagt død. Lægreid meiner årsaka er klar:

– Først og fremst syng han på nynorsk og på ein dialekt som me kan identifisera oss med.

No gler han seg til å sikra seg live-plata som kjem i handelen ein av dei første dagane. Dette er Olav Stedje si første live-plate nokonsinne og Lægreid meiner ho rett og slett er eit must for alle sogningar.