Han trudde mest ikkje sine eigne auge, sauebonden på Barsnes i Sogndal, då det femte lammet til sau 4063 kom ut – like sprekt og livskraftig som dei fire første. No lurer han på kven av naboane som har vore i fjøsen hans.

Skikkeleg heimelaga

Det står mellom to karar, Svein Ølnes eller Torstein Barsnes.

– Eg er neimen ikkje sikker, men ein av dei er det som må ta på seg farsskapet, seier Steinar Barsnes.

Like etter at femlingfødselen på Barsnes vart viteleg starta spekulasjonane om kvar v?ren kom frå. Dei fleste peikte over mot solsida av Baringafjorden og Kvam, men dette stemmer altså ikkje. Her er det snakk om fem heilt ekte nyborne baringar.

Ekstra arbeid

Begge verane som var innom fjøsen til Steinar Barsnes dei aktuelle dagane i fjor haust høyrer heime i grenda.

Steinar Barsnes hadde uansett ikkje rekna med eit slikt resultat. Det var ikkje noko som tydde på at sau 4063 skulle ha meir enn to, toppen tre lam. Ikkje var ho spesielt stor, og det meste ho har fått før er tvillingar.

– Ja, no har eg mykje godt arbeid føre meg, seier sauebonden sjølv.

På topp

Same kor sprek og sterk 4063 er, greier ho ikkje halda mjølk til fem lam. Eit par dagar etter det vesle underet i fjøsen på Barsnes, teiknar det til at Steinar må gje mjølk til to av dei.

– Eg trudde ho hadde to, kanskje tre. Ho såg heilt vanleg ut og er ikkje spesielt stor av seg. At ho skulle få fem kunne eg aldri tenkt meg. Difor sjekka eg henne ikkje etter at det tredje lammet kom. Då var eg sikker på at alt var ferdig, seier Steinar.

Men det skulle altså koma både eitt og endå eitt til.

4063 er fødd i 2004 og såleis i sin beste alder når det handlar om å setja lam til verda.