Vil bryta med Vik

Ordførar Olav Lunden i Leikanger stadfestar at han har motteke ein privat spurnad frå Fresvik, sendt til ordføraren.

95 prosent

Dei to som har utforma brevet, seier dei har 95 prosent av sambygdingane med seg i ønskjet om å bli overflytt frå Vik til Leikanger.

– Me krev ingenting, berre me får ha dei tenestene me alt har i bygda, heiter det i brevet som er sendt ordførar Olav Lunden.

Fresvik (og Feios) var ein del av Leikanger kommune inntil 1991. Då vart dei to bygdene på sørsida, etter meir press frå Feios enn Fresvik, overflytte til Vik kommune. I dag breier desperasjonen seg i dei to vitale småsamfunna.

Leikangerordføraren må vedgå at han er rørt av den tilliten fresvikjene viser Leikanger. Men han vaktar seg vel for å føregripa eit slikt initiativ.

– I si tid var det praktiske grunnar for reguleringa, desse er til stades like fullt i dag, seier Olav Lunden og legg til at ein eventuell overflyttingssøknad er det berre kommunestyret i Vik som kan fremja til departementet.

Fritt val

Ordførarkollega Marta Halset i Vik viste i går lite om spurnaden.

– Kollegaen på Leikanger ringde og informerte meg om brevet. Noko meir veit eg ikkje, seier Halset.

– Forstår du frustrasjonen blant fresvikjene?

– I folkeavstemninga i Fresvik ville bygda bli ein del av Vik kommune og vart det i 1992. Innbyggjarane avgjer sjølve kor dei vil høyra til. Det er full rett å søkja seg over igjen til Leikanger kommune viss dei vil det. Men me vil sjølvsagt ha dei med i Vik kommune.