Situasjonen er mildt sagt dramatisk for Vik kommune som må dekka inn eit tap på 100 millionar kroner etter Terra-saka.

I ettermiddag lanserte rådmann Oddbjørn Ese og leiargruppa si liste med tiltak som skal møta dei enorme, økonomiske utfordringane.

Reduksjon på fem årsverk i kommunehuset, nedlegging av ungdomsskulane i Fresvik og Feios, nedlegging av barnehagen i Feios, flytting av mellomtrinnet ved Valsvik skule og nedlegging av bygdeheimen i Fresvik er blant dei tiltaka som vart presentert for Fylkesmannen og kommunestyret i ettermiddag.

– Eg er imponert over at rådmannen har kome fram til så mange moglege tiltak, kommenterte fylkesmann Oddvar Flæte, og la til:

– Her er det snakk om lassevis med politisk krut!

Og som ikkje dette er nok, kommunen må truleg vurdera å selja kraftaksjar, vedgår rådmannen.