Ungdomskulen startar showet når Zoom Urørt-turneen gjer svingen innom Sogndal og Meieriet i morgon kveld.

– På desse turneane er det vanleg at den lokale arrangøren inviterer eit lokalt band til support. Me har i år invitert Ungdomskulen, som kjem frå fylket. Dei vann riksalarmprisen 2007 og har fått kanonkritikkar i mange anerkjende musikkmagasin verda over. I løpet av dei siste månadane har Ungdomskulen turnert i USA og deler av Europa, fortel Eivind Nordvik Hauge, PR-sjef for Veka.

Enkel sound

Ungdomskulen er samansett av tre unge menn, Frode Flatland, Kristian Stockhaus og Øyvind Solheim. Det er avgjort eit band med ein spesiell sound, basert på bass, trommer og gitar.

Bandet har sitt utspring i det spennande rockemiljøet i Bergen og seier, ifølgje Nordvik Hauge, at dei verkeleg gler seg til å spela i Sogndal torsdag.

På årets Zoom Urørt-turné finn ein Zoom Urørt-vinnarane Gerilja og Sigh & Explode. Gerilja er eit band som har røtene sine i Glamrock, men som hentar inspirasjon fra mange sjangrar.

Sigh & Explode blir skildra som eit scremo/hardcore-band og er i same landskap som JR Ewing, Refused og At The Drive In.

Bonus

Fredag opnar Kurt Nilsen sin Noregsturné på Meieriet og laurdag kveld kjem rosina i pølsa for mange, Kaizers Orchestra, som startar sin omfattande Noregsturné kvelden før, i Bergen.