Det er andre gong fotografen, som ofte har kulturlandskapet som tema i motiva sine, stiller ut i Kunstnerforbundet.

Utstillinga, som opnar laurdag, rommar 14 store veggbilete og 40 små bilete som portefolio.

Kunstnarstyrt

– Det er alltid kjekt å få stilla ut. Utstillinga føregår på bakgrunn av søknad og få får utstilingsplass. Spesielt kjekt er det sidan eg hadde utstilling der i 2003 også, seier Jens Hauge.

Morten Johan Svendsen er direktør i Sogn og Fjordane ved Sogn og Fjordane kunstmuseum og meiner at det å stilla ut ved galleriet der kunstnarar sjølv bestemmer kven som skal stilla ut, vitnar om anerkjenning.

– Kunstnerforbundet er eit av Noregs mest etablerte galleri og er kunstnarstyr. Dette er eit prestisjetungt galleri, seier Svendsen.

Hauge stilte ut bilete i Kunstnarforbundet for fem år sidan. Det er ikkje vanleg at kunstnarar får stilla ut på galleriet så snart.

– Det går gjerne ti år mellom kvar gong, og nokre kunstnarar stiller ut der berre ein gong. Men nokon viser at dei held ein stabil produksjon og får stilla ut fleire gonger, seier Svendsen.

Fotograferer nærmiljøet

Han meiner svart-kvitt-fotoa til Hauge har symbolikk og at ein kan fornemma at kunstnaren har fanga nærmiljøet sitt i bileta.

– Det er allmenngyldige historier frå nærmiljøet. Medan andre reiser verda rundt for å fotografera, går Hauge opp i bakkane like ved huset sitt. Ein kan ikkje sjå at bileta er tekne i Lærdal, men ein kan fornemma det, seier Svendsen.

Hauge er sjølvlært og har fotografert sidan 1971. Etter debuten i 1976 har han jamnleg stilt ut på galleri i inn- og utland.