– Sjøkabel er framtida

Det er venta at andre enn Venstre kjem til å gjera framlegg om å møblera kraftig om på fylkesrådmannen si 420 kV-innstilling.

Provoserer

Rådmann Jan Øhlckers si høyringsinnstilling på den forhatte lina har provosert fleire i det fylkespolitiske miljøet.

Etter det Sogn Avis erfarer kjem dette til å koma til uttrykk gjennom dei tre opposisjonspartia i fylkesutvalet onsdag. Men kanskje kjem jamvel Senterpartiet til å gje uttrykk for at rådmannsinnstillinga er i drygaste laget.

– Fylkesrådmannen er alt anna enn framtidsretta gjennom denne innstillinga, seier Rolf Nesheim, og konstaterer at fylkeskommunen ikkje ein gong luftar utsiktene for ein sjøkabel kopla på Aurland.

Overfører meir

Slik meiner Rolf Nesheim at Sogn kan koma nokolunde heilskinna frå det kolossale linemonsteret.

– Kabling i sjøen har fordelar ut over dei estetiske miljøomsyna, seier han, og viser til eit lite påakta poeng:

– Sjøkabel gjev ti prosent meir straum gjennom overføringa om ein måler mot tapet gjennom overføring i luft. Dette tilhøvet burde vore vektlagt meir, seier han, og ventar forgjeves på at olje- og energiministeren skal tala klart og tydeleg om kva sjøkabling eigentleg kostar.

Han viser til Statnett sine rituelle øvingar om kor mange gonger dyrare det er å kabla ei slik line framfor å overføra i luft.

Kritikkverdig

– Det har vore nemnt at dette kostar 6–12 gonger meir, men det må vera råd å rekna på dette og koma fram med eit tal som er realistisk, seier Rolf Nesheim.

Han meiner det er kritikkverdig at fylkeskommunen ikkje ser koplinga til andre næringar enn kraftsektoren.

– Den norske fjord- og fjellheimen blir ein kjempeattraktiv kvalitet om eit tiår eller to, me må forstå at urørt natur er verdt å ha med seg inn i ei framtid, seier han, og åtvarar mot å køyra rådmannen sitt løp, som han meiner er å skussla bort ein kvalitet ei viktig næring har bruk for.

Rosar sivil ulydnad

– Fylkeskommunen skal vera ein regional utviklingsaktør, då må ein satsa bærekraftig, ein må i alle fall forsøka å la vera aktivt ta del i raseringa av naturkvalitetane våre.

– Sjøkabel med tilknytingspunkt, strekt frå Aurland til Balestrand er svaret, då kan ein samstundes plukka vekk ein god del gamle kraftliner og sanera vekk transformatoranlegg som berre er til sjenanse, seier Rolf Nesheim, og rosar Sp-ordførar Jan Herstad for å ha annonsert sivil ulydnad.

– Slike trugsmål skal ein ta på alvor, me har ein norsk tradisjon på at store naturinngrep kan provosera fram sivil ulydnad, det er såleis særleg miljøspørsmål som mobiliserer slike verkemiddel, seier han.