Planen var at potetbøndene i Lærdal skulle få ta opp om lag 60 tonn poteter denne veka, men sidan handelsbedriftene Bama og Bare har att mykje importpoteter, ser det no ut til å enda på om lag 20 tonn.

– Men det kan me ta fort att på nokre veker. Sidan me no i slutten av veka også skal byrja å levera til Bare, i tillegg til Bama, tippar eg med me i neste veke er oppe i 60–70 tonn, seier Øyri.

7,93 for kiloen

Dei fyrste to vekene er det i hovudsak potetsorten «Juno» som blir teken opp.

– Me reknar med at me vil starta med «Rut» frå veke 27, seier Øyri

Og sjølv om salet har starta tregt, er sesongen ei veke tidlegare i år i høve til i fjor.

– Alt dette er «litt ettersom»; me har med ei levande vare å gjera, og då kjem det an på korleis avlingane er, og når Bergen blir klare til å ta i mot. Av det vesle me har fått i år, ser storleiken ut til å vera betre enn i fjor, så det går lite vekk i småpotet, forklarar Øyri.

Prisane ligg denne veka på sju kroner og 93 øre per kilo, ein pris Øyri er godt nøgd med.

– Det er rett nok litt lågare enn i fjor, men då hadde me ein utruleg god pris.