Ny plate og europaturné

– Me har drege ned tempoet, musikken er meir melodiøst og stemningsfullt, seier Jarle Kvåle.

Tidlegare har Vreid mellom anna jobba med folketonar, men sounden på nyeplata som blir sleppt i juni går mot ein meir 70-tals Black Sabbath.

– Me er blitt eldre, ler bassist Kvåle, og forsikrar at dei framleis høyrest ut som Vreid.

Nynorske tekstar

Tekstane på nyeplata er i si heilskap henta frå ei diktsamling frå 1946 om andre verdskrig og norsk motstand av Gunnar Reiss- Andersen. Bandet fekk lov av diktaren sin familie til å nytta tekstane til albumet, og har oversett dei og gjort små tilpassingar til nynorsk språkdrakt.

– Tekstane er inspirerande. Nynorsk er ein del av vårt varemerke og identitet og byggjer på talemålet vårt, derfor er det naturleg å bruka, seier Kvåle, som tykkjer det er artig at fansen i utlandet vil læra nynorsk for å forstå tekstane. På dei to første platene, «Kraft» og «Pitch Black Brigade» har dei både nytta nynorsk og engelske tekstar.

Toppar turnéplakaten

No ser låtskrivar og bassist Jarle Kvåle, Jørn Holen på trommerer, gitarist Stig Ese Eliassen og vokalist og gitarist Sture Dingsøyr fram til å presentera det nye låtmaterialet på den første, eigne turnéen bandet har. I påska dreg sogningane ut på Nothern Brigade Tour til Nederland, Belgia, Tyskland og England, land som tradisjonelt har hatt mange Vreid-fans.

– Det blir spennande å stå øvst på plakaten, meiner Kvåle og legg til at to norske band vil vera support under turneen. Vreid var i januar på turné i USA, og har gode erfaringar derfrå.

– Det var kjempeartig å sjå at så mange hadde oppdaga Vreid, plateselskapet vårt har gjort ein god jobb, meiner Kvåle og ser ikkje bort frå at det kan bli fleire USA-konsertar saman med andre band ved eit seinare høve.