Medan folk elles i landet har problem med å bli kvitt bilvrak på grunn av ein konflikt mellom bilimportørane og biloppsamlarane, kan folk i Indre Sogn levera bilen til vraking som før, med 1500 kroner i vrakpant.

– Me held fram med å ta imot bilvrak, sjølv om finansieringa er usikker. Mottak av vrak er ein liten del av verksemda vår. Dei rundt 500 bilane me tek imot årleg er berre ein del av alt metallet me tek hand om, men etter grundige vurderingar har me kome fram til at det ikkje vil vera rett av oss å stoppa mottaket, siden me har store og langsiktige leveringsavtalar. Men det betyr ikkje at me er uten sympati for dei som driv med biloppsamling åleine og risikerer store tap, seier driftssjef Raymond Strand ved Sunde Gjenvinning AS.

Konflikten om bilvraka oppstod då bilimportørane frå nyttår fekk ansvaret for kasserte biler. Stridens kjerne er økonomi, nærare bestemt ein stønad på 631 kroner per bilvrak som hoggarane tidlegare fekk dekt av staten.

Over heile landet har ei lang rekke bilopphoggarar stengt portane for nye bilvrak, og dette gjeld også for Sunnfjord Bil i Førde.

– Me har ikkje teke imot bilar til vraking no etter nyttår, og me har vore ute for at folk har måtte returnera med bilvrak utan å få levert, seier dagleg leiar Torbjørn Strømsli.