– Eg trur mora og bestemora har veldig stor sjanse til å vinna fram, seier leiar for aksjonsgruppa, Borghild Berning, til Sogn Avis. For det fyrste kan dei vinna fram gjennom lovverket, og for det andre har barnet budd hos bestemora i lengre tid med barnevernet sitt samtykkje. Difor meiner eg mora og bestemora har store sjansar til å vinna fram i ei slik sak.

Fosterheim

Som Sogn Avis skreiv laurdag, har bestemora fungert som fosterheim for barnebarnet sidan juni i fjor. Men ho har i praksis hatt ansvaret for omsorga i store delar av treåringen sitt liv. No har barnevernsnemnda bestemt at barnet skal inn i ein annan fosterheim, eit vedtak som vart stadfesta av fylkesnemnda for sosiale saker. Saka er anka inn for tingretten, men kjem truleg ikkje opp der før etter jul.

Naboar i området har reagert kraftig på avgjerda til barnevernsnemnda, og no har fleire engasjert seg i kampen for at bestemora framleis skal fungera som fosterheim for barnebarnet sitt. Oddrun Marie Dyrdal har fått engasjert privatetterforskar Walter Andersen, som skal setja seg inn i bakgrunnen for saka.

– Me vil ha fram at det her har skjedd eit overgrep, seier Dyrdal til Sogn Avis. Me vonar og at årdalssamfunnet no kan slå ring rundt dette barnet, slik at me får stogga denne prosessen.

Det er og starta ei kronerulling i Årdal som skal dekka dei utgiftene som måtte koma i samband med saka.

Høgsterettsadvokat Odd Rune Tostrup ved advokatfirmaet Tostrup, Lerum og Grønsfjeld i Stavanger stadfestar at kontoret hans har fått førespurnad om å ta denne saka.

– Me har sagt at me vil sjå på saka, seier Tostrup. Reint generelt vil eg seia at barnevernet i alt for liten grad brukar nær familie som fosterfamilie. Det kan jamvel strida mot den europeiske menneskerettskonvensjonen å unnlata å bruka familie i større utstrekning enn det som blir gjort i dag. Ein måte å betra dette på er å bruka nær familie som fosterfamilie.