Leikanger hylla symjehelten

– Ei fantastisk mottaking, seier symjehelten, etter å ha blitt helsa på bryggja av ordførar Olav Lunden.

– Her i Leikanger tek me godt i mot folk også om dei kjem litt utradisjonelt, seier ordføraren, og overrekkjer kommunevåpnet til gjesten frå fjorden.

Flagget til topps

Klokka 18.20 bykste Lewis Gordon Pugh opp på flytebryggja ved Sognefjord Hotell.

Dei siste to kilometrane inn hadde han selskap med små og litt større båtar.

I Leikanger og på Slinde hadde båtfolket mobilisert fartya sine. Frå landsida hadde bodskapen om Lewis Gordon Pugh sin ankomst til Hermansverk nådd dei fleste. Under Fjedli var minst tre flagg komne opp for høvet.

Ei stor bragd

Mange er imponerte over engelskmannen sin fysiske prestasjon. Men mange ser også kva Lewis Gordon Pugh gjer for fjorden.

Storsymjaren medverkar betre enn nokon til å setja verdas mest spektakulære fjordsystem på kartet. Etter Leikanger er det kun eit spørsmål om dagar før media er over Lewis og fjorden for fullt.

– Ei stor tid for fjorden, seier dei som fortstår seg på slikt.

Ordføraren er ikkje i tvil om at gjesten hans er i ferd med å utføra ei bragd.

– Denne mannen presterer på eit nivå som fortener internasjonalt fokus, seier Olav Lunden.

200 Pugh-fans

Han ser det som viktig at det frå bygdene langs fjorden blir signalisert deltaking og innleving når fjorden blir arena for slik idrett.

I Leikanger hadde mange skjønt nett det. 200 elleville Pugh-fans møtte opp på Nokkaneset måndag ettermiddag.

Same dagen hadde 34-årigen sumt frå Haugaviki, åtte kilometer lenger aust i fjorden. Vel oppe på hotellbryggja vart londonadvokaten omringa av yre bygdafolk.

Holmen ventar

Etter at han dukka ut or den lange «skuggen» under Kaupangerhalvøya, har symjaren blitt synleg att, og resultatet let ikkje venta på seg.

Han såg tidleg at det var folksamt på landsida.

– Eg såg stadig større grupper av menneske etter vegen mellom Fatla og Hermansverk, seier han, og kjende feststemninga for alvor då han fekk auga på folkehopen i hotellhagen.

Men Lewis Gordon Pugh må fokusera på framdrifta. Han var i gang att frå Hermansverk på føremiddagen i går. Han er ikkje halvvegs før han set beina under seg i Holmen, Balestrand er klar til å ta imot Londonekspressen i 14-tida i dag.