– Det vert raskt historie

– Det utgjer eigentleg ikkje nokon skilnad for mitt vedkommande om det er 1. divisjon eller eliteserie. Jobben er den same, seier påtroppande sogndaltrenar Harald Aabrekk.

Han ser fram til å gå i gang med trenarjobben og har ikkje tenkt å hoppa ut i noko heilt nytt.

– Me skal vidareutvikla det som Sogndal har jobba jamnt og trutt med fram til no. Klart det hadde vore kjekkare med eliteserien, det skal eg ikkje leggja skjul på, men det greidde ein ikkje denne gongen. Det blir i grunnen fort historie, det er berre å ta fatt på nytt, og seia at det er det som skjer vidare som avgjer om me er gode nok, seier Aabrekk.

Respektabelt

– Føler du presset no, når du tek over eit lag som har vore særs nær opprykk to sesongar på rad?

– Nei, til det har eg halde på altfor lenge med dette her. Eg ser ein fjerdeplass i år som resulterer i kvalik – og kvaliken i fjor – som ein ganske respektabel prestasjon. Men me ynskjer å vera med i toppen og i det ypparste selskapet, og me har sett at over tid kan Sogndal greia det, seier han.

Satsar lokalt

Sjølv om har formelt overtek frå nyttår, byrjar det alt no ein prosess som skal føra fram til at alle brikkene i Sogndal Fotball anno 2010 skal falla på plass. Framtida til einskildspelarar er ikkje eit tema han diskuterer med pressa på dette tidspunktet.

– Det er mitt utgangspunkt at me skal ha ei verdiskaping i Sogndal som går ut på å utvikla eigne spelarar. Det er det som er grunnsteinen i klubben, og det er klart i tråd med min filosofi. Dei beste spelarane skal me utvikla sjølve, slår Aabrekk fast.

Han seier vidare at arbeidet med spelarstallen framover er ein prosess det samla trenarteamet vil vurdera i fellesskap, og så blir det opp til Trond å lytta til dei innspela teamet måtte ha.

Teamet består i skrivande stund av avtroppande trenar Karl Oskar Emberland og assistent Ole Hjelmhaug, som ikkje får lenga kontrakten sin etter nyttår. I staden skal det etter omrokkeringar vera klart at Trond Fylling, nytilsett administrativ leiar og Torbjørn Glomnes skal fungera som hjelpetrenarar.