Det har vore finale i samlagsskytinga under Landsskyttarstemnet på Evje i dag, og Sogn Indre skyttarsamlag vart til slutt nummer 31 av 43 lag som deltok.

Etter to etappar låg indresogningane på 4. plass, etter at Per Ove Fossheim hadde skote 97 poeng og Tone Anette Espe 96 poeng.

TV–sendt

Deretter skaut Ole Bjarne Hovland 94 poeng, noko som gjorde at laget var på ein åttandeplass før siste og avgjerande etappe. Denne var det ungguten Vegard Solhaug som skulle skyta, og det enda med 91 poeng for 19-åringen.

– Det var ingen dårleg serie, men han hadde problem med innskytinga slik at heile serien vart for høg, seier Ole Bjarne Hovland.

Dei åtte beste laga før siste skyting blir filma av NRK, og det gjorde at det var eit ekstra stort press på Solhaug.

– Han er ein skikkeleg tøff og ville ha denne etappen, nettopp fordi han ville ha så mykje trøkk på seg, fortel Hovland.

Mot dei beste

Alt i alt er han godt nøgd med prestasjonen til laget, sjølv om dei etterkvart hamna eit godt stykke ned på resultatlista. Dei beste skyttarane i landet deltek i denne disiplinen.

– Det blei litt lite poeng på slutten, men me fekk ei god oppleving likevel. Me har ingen meritterte skyttarar, og då tykkjer eg dette var ein bra prestasjon, slår Hovland fast.

Då konkurransen var slutt stod indresogningane med 378 poeng og tolv innarar.

Sunnfjord skyttarsamlag vart nummer 24 i konkurransen, Nordfjord skyttarsamlag kom på 17. plass, og Sogn Ytre enda på ein 41. plass.