Tysdag tek Åge Hareide ut landslagstroppen til EM-kvalifiseringskampane mot Malta og Ungarn. Ikkje uventa har den store mediedebatten i forkant av uttaket handla om kven Hareide skal setja sin lit til mellom stengene. Thomas Myhre sin tabbekavalkade mot Tyrkia og Bosnia tvingar landslagssjefen til å gjera eit val, eit val som etter alle solemerker står mellom Brann sin Håkon Opdal og hissigproppen Rune Almenning Jarstein på nedrykkstruga Odd. Det er då eg spør, har landslagssjefen vurdert Terje Skjeldestad? Og viss ja, kva gjer at han ikkje er aktuell?

Hausten 2005 var sist sogndalkeeperen var inne i landslagsvarmen. Då vart den joviale kaupingen kalla inn som cover for Thomas Myhre i innspurten av VM-kvaliken. Til Sogn Avis svarte Hareide då at spel i 1. divisjon hadde liten betydning for Skjeldestad si moglegheit til å vera i landslagsdiskusjonen. Hareide ville difor ikkje oppfordra Skjeldestad til å byta klubb. Om Hareide meinte alvor, eller om svaret på Bislett var ei høflegheitsfrase til ein utsendt lokalavisjournalist, er det grunn til å så tvil om.

For situasjonen til Skjeldestad er uforandra, sett vekk ifrå at han sidan sist landslagsuttak har utvikla seg til ein endå betre keeper. Kanskje ser vi ikkje dei spektakulære tigerspranga like ofte, men eg torer påstå at større ro, betre posisjonerings- og vurderingsevne har gjort Terje Skjeldestad til ein meir stabil og sikker keeper enn me har sett han i tidlegare utgåver. Likevel har Skjeldestad forsvunne like raskt ut av landslagsdiskusjonen som Hareide valde å bringa han inn.

«Utestenginga» av Terje Skjeldestad bør ikkje vera på grunn av konkurrentane sine uoppnåelege prestasjonar. Rivalane har blitt færre og ikkje spesielt mykje betre. Thomas Myhre har eliminert seg sjølv og verken den nye vinen i Opdal eller Jarstein har kvalitetar som bør skremma Terje Skjeldestad. Om Åge Hareide har litt guts, og overser dei kritiske røystene som automatisk vil dukka opp ved å ta ut ein keeper frå 1. divisjon, så tek han seg ein tur til Fosshaugane i løpet av sommaren og finsiktar sogndalmålvakta. Då kan han også få med seg ein komande landslagsstoppar.