Nytt banedekke. Flomlys. 5000 på tribunen. Det meste låg til rette for ein fotballfest på Fosshaugane Campus fredag kveld. Heilt til domaren bles i gong kampen.

– Første omgang var elendig, og det verka som det var for seint på kvelden for nokre av spelarane våre. Me skulle gå ut og køyra på frå start, men gjorde i staden det stikk motsette. Det er frustrerande, seier Furebotn til Sogn Avis etter kampen.

Svake

Og årdølen sin oppsummering er ikkje feil.

Sogndal var upresise frå avspark, og spesielt dei første 45 minuttane verka ikkje laget å trivast med å endeleg ha fått skikkelege speletilhøve i eiga storstove. Laget var baktunge, pasningane utan postnummer og adresse, og spelarane sleit stort med å finna kvarandre.

Khalifa Jabbie banka inn 1–0 i det 26. minutt, medan Alexander Ruud Tveter sørgde for 2–0 like etterpå.

– Presset sat ikkje, og me vann ikkje andreballar. Baklengsmåla var dårleg av oss, der me ikkje fekk klarert returane skikkeleg, seier Furebotn.

Vart bua på

Ulrik Flo reduserte for Sogndal timen ut i kampen då han stanga Kenneth Udjus sitt lange oppspel over Jon Knudsen og i mål, men trass i ein god periode like før og etter scoringa - der mellom anna Eirik Skaasheim heada i tverrliggjaren - kom ikkje sogndølene nærmare poeng.

Fem minutt før slutt punkterte den tidlegare Sogndal-spelaren Ole Jørgen Halvorsen til 3–1, då han skrudde ballen i nettet bak Udjus. Halvorsen valde å ikkje feira scoringa.

– Men eg burde kanskje gjort det, då det var ein del på tribunen som bua på meg. Men eg valde å drita i det, og ville visa respekt for Sogndal. Eg hadde fine år i klubben, og trivdes godt i bygda, seier Halvorsen til Sogn Avis.

– Vart stressa

Sogndal-trenar Jonas Olsson meiner kvaliteten i avslutningane bikka kampen i Fredrikstad sin favør.

– Me hadde liknande sjansar som Fredrikstad ved Tonny (Brochmann) og Ørjan (Hopen), men dei scora på sine gjennom to fantastiske avslutningar. Elles var det ein jamn kamp, seier Olsson.

– Kva er det som sviktar i laget før pause?

– Dei to måla i mot gjorde oss stressa, og det hjelpte heller ikkje at me spelte med ti mann i sluttfasen av omgangen, seier Olsson med referanse til då Taijo Teniste måtte ut med hovudskade dei siste sju minuttane av første del av kampen.

Les meir om kampen i Sogn Avis laurdag.