1. omgang var ikkje mykje å skryta av, men siste del av 2. omgang vart spennande og målrik.

2-2 stod det då dommaren bles av kampen, etter at Kaupanger leia to gonger på heimebane mot Førde onsdag kveld.

– Me er ikkje gode nok i dag til å ta tre poeng. Førde kom på dei overgangane dei fekk, eller me gav dei. Me var ikkje nøyaktige nok, seier Kaupanger-trenar Marius Bøe.

Få sjansar

Til pause stod det 0-0, etter ein omgang med lite presisjon i spelet og få målsjansar. Utover 2. omgang fekk Kaupanger betre kontroll, og Åse Neraas fekk pannebrasken på eit innlegg som den ellers gode Førde-keeperen feilberekna. Dermed stod det 1-0 etter 62 minutt.

Men Førde har ein giftig måltjuv i Linda Saltskår. Ho sende i veg eit skot som gjekk i mål i det 80. minutt, og til då hadde ikkje Førde ikkje vore særleg kvasse framfor mål.

Keeperen til gjestene, Anette Saltskår, stod godt og varta mellom anna opp med ei feberredning då Neraas tidlegare i kampen kom åleine mot keeper.

– Me er ikkje betre i dag, og Førde er gode som klarer eitt poeng mot oss. Me hadde sjansar til å skåra meir, men dei har ein glimrande keeper, og ho redda dei i dag, seier Bøe.

Hendingsrikt

Etter utlikninga til Førde skjedde det mykje. Vårin Ness blei felt like innafor 16-meter streken og dommaren peika på straffemerket. Straffeeksekutør Åse Neraas sende ballen høgt over mål.

Kaupanger har effektive Henriette Helle. Ho har slitt med influensa, men kom inn mot slutten av kampen. Ho braut seg fri frå Førde-forsvaret på eit gjennomspel og sende ballen forbi Saltskår fem minutt før fulltid. Kaupanger jubla vilt for skåringa som såg ut til å sikra grøntrøyene tre poeng. Men måltjuv Linda Saltskår var frampå att i det 90. minutt og lempa ballen over Guro Øydvin i Kaupanger-buret.

– Eg føler at dei måla kom ut av ingenting. Men me visste på førehand at Saltskår er ein måltjuv, seier Bøe.

Alt i alt tykkjer han Førde fortente det eine poenget i dag, sidan Kaupanger ikkje var gode nok til å dra i land sigeren.

– Me har mykje ball i første omgang, men er upresise. Det er litt betring i andre omgang, men det er likevel ikkje ein god prestasjon, seier Bøe.

Kaupanger skal no møta Loddefjord borte på laurdag før dei tek fotballferie.

Kaupanger - Førde 2–2 (0–0)

2. divisjon damer, Kvernhushaugen

Mål:

1–0 Åse Neraas (62. min), 1–1 Linda Saltskår (80. min), 2–1 Henriette Helle (86.min), 2–2 Linda Saltskår (90. min)

Dommar: Sindre Myrvang, Sogndal

Startoppstiling Kaupanger: Guro Øydvin, Stine Hovland, Hanne Wold, Josefine Sannebro, Aina Røyrvik, Martine Wolf Nesse, Åse Neraas, Marthe Botten, Synne Sofie Christiansen, Elisabet O. Nilsen, Vårin Ness. Innbytarar Ida Dalaker, Henriette Helle og Åshild Hereid Haugen.

Førde: Anette Saltskår, Marte Holsen Kyte, Silje Kopke de Fonseca, Sara Soroya Eriksen, Kristine Høyvik Hilde, Andrine Helgås, Siri-Maria Angelica Sættem, Annelin Frøysland, Kristina Knutson, Eirin Hegrenes, Linda Saltskår. Innbytarar Henriette Jagedal, Camilla Ulvik Stenseth, Silvia Kapstad.