– Me fornyar ikkje med Barry. Han har vore her i fleire år og levert bra, men har samstundes vore veldig ujamn. No har me henta inn fleire spelarar som kan spela i han sin posisjon, og vil gje dei sjansen, seier sportsleg leiar i klubben, Trond Fylling til Sogn Avis.

Usikker framtid

Kader sjølv veit ikkje kva framtida vil bringa etter sesongen.

– Eg må snakka med agenten min om å finna meg ein klubb. Om det blir her i Noreg eller i utlandet veit eg ikkje, seier ivorianaren, som var aktuell for eit prøvespel hos den franske eliteserieklubben Nice i sommar, utan at det vart noko av.

25-åringen kom til Sogndal i 2006, og har hatt ei berg- og dalbane karriere i saftbygda. I mai 2009 stakk han på prøvespel i Frankrike utan løyve frå klubben, og vart løyst frå kontrakten nokre månader seinare.

Men sesongen etter vart han henta attende av Fylling og kompani, og var ein viktig bidragsytar til at dei kvitkledde gjekk til topps i 1. divisjon og sikra opprykk til eliteserien. I år har han vore meir ustabil, og er no ute av laget etter ein periode plaga av skadar.

Tungt år

Dermed vert eit tungt år tyngre for Kader. I vinter vart han råka av dødsfall i nær familie, på same tid som heimlandet Elfenbeinskysten blei herja av borgarkrig.

Kader har kone og born heime i Afrika, men har ikkje sett desse på ni månader.

– Det har vore ei vanskeleg tid for meg. Eg prøvde å få familien min hit til Noreg, men det gjekk ikkje. No er det lenge sidan eg har sett dei, og me held berre kontakten via telefon, fortel han.

Bendik neste?

Også andrekeeper Joe Bendik (22) sine dagar i klubben kan vera over. Amerikanaren er lei av å vera andreval bak Kenneth Udjus (28), og vurderer dermed å flytta på seg.

Både Bendik og Udjus har utgåande kontraktar, der sistnemnde er i sluttforhandlingar om sin. Blir Udjus verande reiser truleg Bendik.

– Det blir vanskeleg for meg å bli verande viss Kenneth skriv ny kontrakt. Eg er 22 år, og bør spela fast på dette stadiet i karrieren min, seier Bendik, som då vurderer å prøva lukka i den amerikanske proffligaen Major League Soccer (MLS).

Totalt ti spelarar i Sogndal-stallen har kontraktar som går ut etter sesongen. Les oppdatert status rundt desse og meir stoff om Sogndal Fotball i dagens papirutgåve av Sogn Avis.