Solheim scora sitt første etter ni minutt av oppgjeret, då han heada eit frispark frå Ørjan Hopen i mål til 1–0.

Tommy Øren fiksa 2–0 etter 25 minutt då ein lang ball frå Vegar Gjermundstad gjekk over alle, slik at årdølen elegant kunne lobba ballen over Vik sin polske sisteskanse Piotr Cupryn.

Giftig kombinasjon

Kombinasjonen Hopen-Solheim var vanskeleg å stoppa for Vik, noko som raskt viste seg igjen. Like etter Øren-scoringa heada Solheim ein corner frå Hopen i nettet til 3–0, før han gjorde nøyaktig det same sju minutt seinare til 4–0.

Vik reduserte på straffespark ved Marius Valsvik etter 35 minutt, medan Øren scora sitt andre for dagen like før pause etter førearbeid av Olav Fretland.

Jamt etter pause

Bortelaget heva seg etter pause, og spelte jamt med Sogndal sitt andrelag som besto av seks spelarar frå a-stallen.

Omgangen sin einaste scoring kom frå Øystein Myrkaskog, som reduserte til 5–2 då han klinka ballen nede ved høgre stolperot etter 66 minutt.

– Skal ikkje gå an

Vik-trenar Stig Roar Hovland er frustrert over måten laget hans slapp inn baklengsmål på.

– Det skal ikkje gå an å sleppa inn tre dødballmål på ein omgang. Me skal vera store og sterke, og plar vera gode på den delen av spelet. Me hang bra med før pause og, men det er ikkje hjelp i når me slepp inn slike mål, seier Hovland.

– Men eg er stolt over at spelarane sto opp etter pause, og ikkje gav opp trass i at dei var under med fire mål. Då presterte me slik me skal, og det må me ta med oss vidare.

Langt opp

Dermed har Vik heile ni poeng opp til Florø på 6. plass når seks rundar av 3. divisjon gjenstår.

– Me møter Florø komande helg, som vert ein heilt avgjerande kamp med tanke på å unngå nedrykk. Vinn me den har me ein sjanse, tapar me er nok det meste køyrd, seier Hovland.