Rundt 1.000 orienteringsløparar frå over 15 forskjellige land kjem til Sogn for å delta i Nordvestgaloppen om to veker.

Orienteringsgruppa i Sogndal IL hadde i går fått 830 påmelde løparar til Fjord-O Nordvestgaloppen, og med dei som kjem i siste liten, reknar klubben med å ha 1.000 løparar på startstreken. Når familie og hjelparar kjem i tillegg, ventar dei at rundt 1.500 personar vil vitja Sogndal medan konkurransane går føre seg frå 14. til 18. juli.

Gler seg

– No gler me oss masse til å koma i gang, og eg er glad for at me er blitt så godt mottekne i orienteringsmiljøet, både i Noreg og internasjonalt. Det er ikkje tvil om at o-løping i fantastisk fjordnatur trekkjer folk, og spesielt dei to løpa på Haukåsen har vore ettertrakta, seier Karl Helge Albretsen i arrangørkomiteen.

VM-oppkøyring

Christian Frøyd peikar på at konkurransane i Sogn går føre seg berre tre veker før VM i orientering startar i Trondheim, og difor vil mange av toppløparane ta konkurransane i Sogn som ein viktig oppkøyring før VM.

Les meir om det store arrangementet i Sogn Avis torsdag.