–Eg visste ikkje at eg vart beste dame før pappa sa det då eg kom i mål. Eg fekk litt sjokk, seier Martine Wolff Nesse etter den uventa sigeren.

Yngste vinnar

14-år gamle Martine Wolff Nesse frå Balestrand er truleg yngste vinnar i dameklassen i heile Esefjorden Rundt si 31 år gamle historie.

Ho sprang inn til tida 36.31 på det 8,5 kilometer lange løpet 1. mai. Det var nesten eitt minutt raskare enn andreplassen, Anne Kårstad Skaar frå Førde.

Fotballspelar

Martine er eigentleg fotballspelar og tok det heile som ei treningsøkt.

–Eg spelar for det meste fotball med jentelaget og gutane og pleier ikkje trena nokon særleg på asfalt.

1.mai- helga har også andre store høgdepunkt for Martine. I dag har ho konfirmasjonsdag i Tjugum Kyrkje.

Ser fram til konfirmasjon

–Kva vert høgdepunktet i helga då?

–Eg har gledd meg veldig til konfirmasjonen også. Me skal feira med familien, seier Martine, som ikkje trur ho får nye løpssko i gåve.

240 nye deltakarar

Løpsleiar Nils-Magnar Feten meiner at Martine må vera yngste vinnar av løpet. Og konfirmasjonshelg gir også oppsving for deltakartalet.

–Me har 240 nyregistreringar og det har nok samanheng med at det er konfirmasjonshelg, seier Feten. I år deltok 942 personar i Esefjorden Rundt, det er ny rekord.