Sigurbjørnsson var på prøvespel hos årdølene i januar, og imponerte trenar Nils Tore Krosshaug so mykje at overgangen no vert permanent.

– Han gjorde eit veldig godt inntrykk. Trausi er god i feltet, flink éin mot éin, og er ein veldig høyrbar keeper som kommanderer forsvaret på ein god måte. Me er nøgde med at han er klar for oss, seier Krosshaug.

Har landskampar

Sigurbjørnsson har spelt fleire aldersbestemte landskampar for Island, seinast på U19-landslaget. No skal han kjempa med talentet Stian Karlsen om rolla som førstekeeper for raudtrøyene.

– Stian har gjort ein god vintersesong for oss, og er vår førstekeeper per no. Me har berre hatt éin keeper i stallen sidan nyttår, so det var viktig for klubben å få dette i orden, seier Krosshaug.

Sigurbjørnsson er heime på Island for å pakka flyttelasset, og er venta å koma til Årdal på laurdag.