Dale toppar tabellen med 16 poeng, medan Sogndal følgjer like bak med 15.

– Me er veldig nervøse. Me har vore særs nære å rykkja opp dei to siste sesongane, utan å lukkast. Me kjenner oss veldig klare for prøva oss på eit høgare nivå no, seier trenar Sølvi Skartun (24).

Suverene

Sogndal, som har ei blanding av lokale spelarar og studentar i spelarstallen sin, har saman med Dale vore suverene i årets 4. divisjon. Dei gjekk ubesigra gjennom del éin av seriespelet, medan det berre har vorte eitt tap etter samanslåinga med Fjordane-divisjonen etter nyttår.

– Me er for gode for 4. divisjon, då me vinn dei fleste kampane med 10–15 mål. Det blir litt lite utfordrande for spelarane i lengda, difor ønskjer me å testa oss eitt hakk høgare oppe, seier Skartun.

– Om me skulle rykkja opp blir det spanande å sjå korleis me klarar oss, då det er stor forskjell på nivået mellom dei to divisjonane.

Ventar jamn kamp

Då Sogndal og Dale møttest i byrjinga av mars var kvittrøyene best, og sigra 28–24. Skartun ventar ein jamn kamp mot serieleiaren på laurdag.

– Me har begge vore suverene i kvar sin divisjon. Men dei har truleg fått betre matching enn oss, då nivået i fjordane er noko høgare enn her i Sogn. Nøkkelen til å slå dei er å stå godt i forsvar, samt å utnytta kondisjonen vår. Eg trur me er det best trente laget i divisjonen, då me har avgjort mange av kampane våre i dei siste 20 minuttane denne sesongen, seier ho.

– I tillegg må me sjølvsagt halda hovudet kaldt, og ikkje lata oss påverka av kor mykje dette betyr.

Viktig

Skartun meiner det vil vera viktig for klubben å ta steget opp til 3. divisjon.

– Eg trur det kan bety mykje, både for spelarane og interessa rundt laget. Spelarane som ønskjer å satsa vil sjå at dette er ein klubb det går an å utvikla seg i, og det vil bli enda meir attraktivt for publikum å koma og sjå på oss, seier ho.

– Eg vil oppmoda folk om å ta turen til Sogndal Idrettshall på laurdag, der me satsar på at det blir fulle tribunar.