Sogndal gjer to endringar i høve det laget som tapte 1–2 mot Sarpsborg måndag; Barry Kader erstattar Ørjan Hopen på venstrekanten, og Ulrik Flo kjem inn for Joakim Rudolfsen på topp.

I form

Kader har vist seg positivt fram på dei få treningane han har vore med laget på La Manga.

– Barry har vore veldig kvikk på trening, og verkar å vera i bra form. Me ønskjer å sjå han i aksjon før seriestart, og får ein god sjanse til det no, seier hovudtrenar Harald Aabrekk.

– Ulrik har hatt ein opptur her nede, som eg håpar han kan ta med seg inn i kampen mot Fredrikstad. Det er kjekt viss han får ut det potensialet me veit han sit inne med, seier Aabrekk.

Må få vekk feila

Eidaren er klar på kva som må til for å slå divisjonsfavoritten frå plankebyen.

– Me må luka vekk dei personlege feila. Begge baklengsmåla mot Sarpsborg kom som følgje av enkle personlege feil, det må me klara å unngå. Me er godt førebudd, og viss me klarar det har eg god tru på at kampen skal bikka i vår favør, seier han.

Justeringar

I tillegg til dei to spelarbyta vert det litt endring av taktikk i morgondagens kamp, som vert sparka i gong klokka 15.

– Me må prøva å vera meir kompakte i midtbaneleddet, slik at me kan bruka meir krefter offensivt. Mot Sarpsborg vart det ein del tunge returløp for midtbanespelarane, som gjekk utover den offensive slagkrafta. I tillegg må me prøva å gjera enklare val med ballen, seier Aabrekk.

Sogndal sitt lag mot Fredrikstad (4-4-2): Piotr Leciejewski - Mats Solheim, Even Hovland, Lars Grorud, Per Egil Flo - Ole Jørgen Halvorsen, Henrik Furebotn, Ahyee Aye Elvis, Barry Kader - Ulrik Flo, Espen Olsen