Det seier dagleg leiar i Sogndal Fotball, Egil B. Mundal.

Sogndal Fotball hadde årsmøte onsdag og kom fram til at bygging av den nye tribuna blir skrinlagt. Utviklinga på området har vore kraftig, men no stoppar det for Sogndal Fotball sin del.

– Det er ekstremt beklageleg, og det er bittert å ikkje få det til, seier Mundal.

Årsaka til at tribunebygget på bjørkesida ikkje kan realiserast, er rett og slett at klubben ikkje har pengar til det. Tribuneanlegget kostar 15 millionar kroner, og i ein situasjon med stram økonomi har ikkje Sogndal høve til å ta dette løftet. Underskotet for 2009 vart 6,9 millionar kroner.

– Det har vore vårt største ønskje å få til tribunebygget. Men klubben har gjort sitt til å utvikla den samfunnsaktiviteten som føregår her, og me har avgrensa med midlar. Me kan ikkje setja heile klubben i fare på grunn av den siste brikka, seier Mundal.

Det er oppretta ei gruppe på Facebook der medlemmene seier seg villige til å donera ein 200-lapp for at Sogndal Fotball skal få finansiert den siste tribuna på Fosshaugane Campus. Gruppa nærmar seg 350 medlemmer.