Noregsmeister på heimebane

– Det er jo stas å vinna på heimebane, veldig kjekt, seier Silje Storevik Moe frå Syril Telemark.

Ho gjekk heilt til topps under NM i fjelltelemark i Systrondfjelli i dag, og 23-åringen var godt nøgd med dagen.

– Det var kjekt å få NM hit, og det vart eit bra løp når det vart som det vart. Det var synd me ikkje kunne starta heilt på toppen, men det vart ei bra løype lell, slår den ferske noregsmeisteren fast.

På grunn av dårleg sikt på det planlagde startpunktet måtte nemleg starten på fjelltelemarkrennet flyttast lenger ned, men det la ikkje noko dempar på stemninga i mårområdet i Oreveitane. Og gullmedaljen til Storevik Moe var berre ein av tre medaljar arrangørklubben Syril Telemark stakk av med i seniorklassane. Ronja Vangsnes fekk bronse i kvinneklassen, og Torgeir Sværen Henjum vart nummer to i herreklassen. Han kom i mål to sekundar bak John-Ove Sinnes frå Sirdal Skilag, som dermed kunne reisa heim med ein kongepokal i bagasjen.

– Kor mykje ville du ha gitt for den kongepokalen?

– Hehe, eg skulle gitt alvorleg mykje for den kongepokalen. Eg veit om eit par småfeil eg gjorde oppi der, men veit ikkje dei kosta meg, seier Sværen Henjum, som likevel er godt nøgd med sølvmedaljen på heimebane.

Han køyrde med lånte ski og sko og har prøvd fleire skipar dei siste dagane.

– Dei eg enda opp med, hadde eg ikkje prøvd før i dag, men dei var veldig bra, fortel han og takkar Dagfinn Ylvisåker og Tore Frimannslund for lån av ski og sko.

Også i aldersbestemte klassar gjorde lokale løparar det skarpt i NM-løypa i dag. Olaug Grut Andersen frå Syril Telemark vann landsfinalen for jenter 12-13 år, medan Olav Henjum og Ole-Morten Søderholm, begge Syril, vart nummer ein og to i tilsvarande guteklasse.

I landsfinalen for jenter 14-15 år gjekk Sarah Fiskaa Haugen frå IL Bjørn/Luster Telemark til topps, medan Gunnhild Sofie Vangsnes kom på tredjeplass. I landsfinalen for gutar 14-15 år kom Håvard Lefdal Hove og Øyvind Vagstad frå Syril på høvesvis første- og andreplass.