Nils Tore Krosshaug sine menn tok leiinga ved Christian Stedje, då kantspelaren drog av to Sogndal-forsvarar og satte ballen i nettet frå omtrent død vinkel.

Sogndal utlikna til 1–1 litt seinare, då Moustapha Cisse sette returen frå eit frispark i mål bak Stian Karlsen. Ole Jørgen Halvorsen sørgja for pauseresultatet 2–1 til sogndølene då han banka ballen i nettet på volley frå fem-seks meter.

Sterk andreomgang

Etter styrte Årdal FK mykje, og utlikna fortent etter 62 minutt då midtbanemotoren Tim Teigen vann ballen inne på Sogndal sin halvdel, forserte nokre meter og plasserte den i mål bak Joe Bendik frå om lag 16 meter.

Knappe ti minutt seinare heada innbytar Brede Stedje Ylvisåker inn 3–2 etter eit godt innlegg frå høgreback Fredrik Prestegård.

Sogndal sette inn eit lite trykk mot slutten, og burde utlikna då Cisse heada ballen utanfor på blank kasse frå fem meter.

Mykje byter

Begge lag gjorde mange byter i løpet av kampen, og det vart mykje unge spelarar på bana etter kvart. Mellom dei som imponerte mest var heimelaget sine 16-åringar Jonas Hestetun og Ole Morten Jevnaker.

Hestetun viste fleire gonger fram sin gode pasningsfot og kloke fotballhovud i si hengjande spissrolle, medan Jevnaker la ned mange meter sentralt på midtbana og hadde god kontroll på Henrik Furebotn som returnerte til sin gamle heimearena.

– Fantastisk moro

– Det er fantastisk moro at desse to presterer so bra. Dei var gutespelarar i fjor, og viser seg allereie fram på dette nivået. Det gledar meg at me klarar å få opp eigne talent, seier ÅFK-trenar Nils Tore Krosshaug.

– Me spelte ein meget god kamp idag. Spelarane var aggressive og hadde stort trøkk i spelet sitt, me fekk masse gjenvinningar på deira halvdel, og fekk til ein del bra spel, seier trenaren.