Under tittelen «United planlegger å kjøpa den norske Nemanja Vidic» står det at United-manager Sir Alex Ferguson er mektig imponert over Hovland, og at han vil gjera overgangen til den norske kraftpluggen permanent etter to imponerande prøvespel.

Reiser i sommar?

Vidare står det at fleire engelske Premier League klubbar og norske eliteserieklubbar jaktar på Hovland, noko som kan få United til å handla raskt.

– Ferguson vart mektig imponert over Hovland i løpet av dei to prøvespela hans. Det faktum at han fekk koma attende for andre gong viser kor godt han gjorde det, har den engelske nettstaden sitert «ein kjelde som står nær Hovland» på.

Det britiske overgangsvindauget er no stengt, dermed kan ikkje Hovland verta offisielt klar for klubben før i somar. Men det er vanleg praksis å signera førehandsavtalar, slik United gjorde med Fulham-stopparen Chris Smalling i januar. Smalling spelar for London-klubben ut sesongen, før han reiser nordover til Manchester i juni. Ein liknande avtale kan verta gjort med Hovland.

Veit lite

Hovland hadde sjølv fått med seg innhaldet på goal.com si side då Sogn Avis tok kontakt søndag føremiddag.

– Dette er nok berre skriveriar. Eg har ikkje høyrt noko nytt sidan eg kom heim frå Manchester, og veit lite om kva som skjer frå den sida. Det er uansett ikkje fokuset mitt, då eg berre tenkjer på Sogndal og vår sesongoppkøyring, seier han.

– Kva tykkjer du om samanlikninga med Vidic?

– Det er sjølvsagt positivt, då han er ein veldig god midtstoppar. Men igjen, dette tenkjer eg veldig lite på.