Grorud vart operert etter sesongslutt i fjor, og har drive med rehabilitering sidan. No er han klar for spel, og var på bana dei første 45 minuttane i treningskampen i Sunnmørshallen.

Aarøy spesial

Sogndal opna kampen godt, og var nære ved å scora då Ulrik Flo heada på utsida av stolpen etter seks minutt.

I staden var det Aalesund som tok leiinga, då Tor Hogne Aarøy steig til vérs på fem meter og stanga ballen i nettet bak Piotr Leciejewski 20 minutt ut i kampen.

Eit kvarter seinare satte Magnus Sylling Olsen inn 2–0, nok ein gong var Aarøy involvert. Fyrtårnet brysta ballen ned til Sylling Olsen på seks meter, Leciejewski kom ut men klarte berre å slå ballen i den tidlegare Kongsvinger-spelaren og i mål.

Reduserte på straffe

Etter kvilen gjorde begge lag mange byter, og det vart skapt få sjansar. I kampens nest siste minutt skaffa Moustapha Cisse straffespark til Sogndal, der Ole Jørgen Halvorsen var sikker frå krittmerket og reduserte til 1–2.

Dermed står Sogndal med éin siger, éin uavgjort og to tap under Harald Aabrekk si leiing so langt.