I fjor var Kai Risholt toppscorar på Sogndal. I år har han vore inn og ut av førsteellevaren til Kongsvinger.

Etter å ha hatt ei fast rolle som bakromsspiss under Tom Nordli, har det vorte mindre speletid under etterfølgjaren. Fredag håpar Risholt å vera ein av dei elleve utvalde i opprykksdramaet mot Sogndal.

– Eg har eit godt håp om å få starta. Eg er i god form og leverte ein god kamp sist, seier Risholt.

Avgjer gjerne

Og Kai Risholt har eit brennande ønskje om å gå sigrande ut av ein kvalifiseringskamp. Det har han ikkje gjort sidan han var med på å rykkja opp med Start. Som Hønefoss-spelar rauk sjansen til å få kvalifisering i siste kampen. I fjor tapte han opprykkskampen med Sogndal.

– Det er utruleg mykje kjekkare å vinna, seier Risholt som ikkje har noko i mot å vera den som avgjer bataljen mot gamleklubben Sogndal på fredag.

Nordens beste keeper

På Kongsvinger rår det skikkeleg god gamal fotballfeber før møtet med dei svarte og kvite fredag. På gata går diskusjonane høgt, og fredag blir det garantert folksamt på tribunane.

– I byen blir det snakka mykje om å møta Fredrikstad, det er som om ein gløymer at me må slå Sogndal før det eventuelt blir situasjonen, seier Risholt.

Og det trur ikkje den tidlegare Sogndal-spelaren er gjort i ei handvending.

– Eg trur det blir ein veldig tett og jamn kamp. Sogndal er det gjerrigaste laget i 1. divisjon, av og til kanskje litt for gjerrige. Og så har dei den beste keeperen i Norden mellom stengene. Skal me klara å overlista Piotr, må ballen anten setjast rett i krysset eller mellom beina, seier Risholt.