Opprykkstoget er ikkje gått for Sogndal, men vegen fram kan virka tøff. Det meiner i alle fall spelselskapa som ikkje levnar Sogndal store sjansar. Akkurat det trur Håvard Flo ikkje er noko ulempe for Sogndal.

– Det er alltid ein fordel å vera utfordrar. Det trur eg passar odds bra, seier Flo og legg til:

– Me har gjort gode kampar på Gjemselund tidlegare, seier han. Seinast i vår då Tarjei Dale netta to gonger og sikra Sogndal ein fortent siger.

– Ikkje håplaust

Fredag har laget sjansen til å motbevisa oddssetjarane.

– No handlar det om å bruka veka godt. Me må rista av oss vonbrotet etter Hønefoss-kampen og kvar og ein av oss må henta ut det aller beste, seier Flo.

Når laget spring ut på Gjemselundmatta fredag er det vinn eller forsvinn. Fredag skal det kårast ein vinnar. Står det uavgjort ved full tid, blir det ekstraomgangar. Står det resultatet seg etter 120 minuttar, skal det heile avgjerast på straffespark.

Sikre på Fredrikstad

Bookmakerane verkar skråsikre på at Fredrikstad vinn den tøffe kvalifiseringa til Tippeligaen, og at Sogndal taper mot Kongsvinger. Hjå «Betsafe.com» får du no berre 1.60 i odds på at raudbuksene også spelar i landets øvste divisjon i 2010.

Til samanlikning gir Kongsvinger-opprykk 4,5 i odds, og Sogndal-triumf 6,50 i odds. Skulle Sarpsborg 08 gå heile vegen gir det solide 9 i odds.