Pokalen som forsvann

Fotballaget til Veitastrond blei skipa i 2004, og sidan då har strendingane sikra seg berre ein pokal – då dei vann KM i femtedivisjon i fjor haust.

Då skulle ein kanskje tru at dei vakta pokalen og plasserte han på ein lur plass, gjerne bak ei glasdør med lås på. Så feil kan ein ta.

Borte vekk

– Eg har ikkje sett pokalen sidan me fekk han. Eg anar ikkje kvar han er, seier veitastrondtrenar Emil Heggestad til Firda.

Enkelte av spelarane meiner pokalen blei sett igjen i bomstasjonen i Fjærland, strendingane fekk nemleg premien etter å ha vunne 5-3 mot Førde i KM-finalen på Skei. Men mannskapet på bomstasjonen har ikkje sett den forsvunne pokalen.

Trenar Heggestad forsikrar om at det ikkje blei feira i hardaste laget etter finalen, og meiner at pokalen ikkje kan ha forsvunne i sigers- eller anna rus.

– Nei, me gjorde ikkje det heller. Kanskje det er nokon som spelar oss eit puss, undrar trenaren for den unge fotballklubben.