Sjølv om kampen var jamnspela frå fyrste kast, men Jotun hadde overtaket det meste av fyrste omgang. Stillinga ved pause var 13-11 i vertskapet sin favør, og andre omgang heldt fram som fyrste slutta. På eit tidspunkt leda Jotun 20-15, men godt halvveges ut i omgangen, byrja det å stokka seg og NHHI tok att heile forspranget. Etter to særs kaotiske sluttminuttar der Jotun måtte spela med ein mindre, enda kampen med 26-26 og poengdeling.

– Det er bittert. Eg har ikkje ord. Det er alt eg kan seia nett no, sa ein nokså mutt trenar Øyvind Indrebø umiddelbart etter kampen.

Kaptein Marianne Stedje Øren er noko meir snakkesalig, men vedgår at det er skikkeleg surt.

– Forsvaret er bedre i dag enn sist, me har meir humør og meir tenning, tykkjer eg. Når me køyrer tempo er me fleire hakk betre enn NHHI, og me burde ha valsa over dei, men det skjærer seg heilt i etablert angrep denne gongen, seier ho.