Tilhengjarskaren rundt klubben fryktar nemleg at Veistastrond blir slaktoffer i neste års 5. divisjon om den pensjonerte midtbanestrategen ikkje knyter på seg fotballskoa att.

Stort behov

«2007 sesongen har stort sett vore ein sportsleg opptur. Likevel har det svikta totalt i enkelte kampar, og særleg 1–9 tapet mot Hafslo er hardt å svelja. I slike kampar ville ein rutinert spelar som Frank gått inn og samla troppane, heldt roa og hindra at me hadde gått på slike kjempesmellar. No når me skal opp eit nivå er eg stygt redd for at det vil komma mange slike kampar, og då vil Frank vera skilnaden på ein fiasko- eller ein suksessesong.», skriv onkel og initiativtakar, Arvid Heggestad på klubben sin eigen nettstad.

Han adopterte difor Saftkokaradn sin Eirik Bakke-aksjon og gjekk til innsamling av underskrifter i lustrabygda som tel om lag 110 innbyggjarar. Og etter ein månad lang kampanje ser det ut som den såkalla «VIL-fansen» lukkast best. For medan Eirik Bakke ser ut til å bli verande i Brann, har den pensjonerte Veitastrond-strategen bestemt seg for å ta supporterane sitt krav om comeback til etterretning.

34 signerte

På klubben sin avslutningsfest sist helg fekk 33-åringen overrekt lista som stadfesta at 34 personar, eller om lag 31 prosent av bygdefolket, ønskjer Heggestad tilbake på Leikvoll stadion. Etter eit familieråd gav Heggestad etter for trykket og sendte ut pressemelding der han gav fotballkrinsen beskjed om at han ofrar dommarkarrieren til fordel comeback i VIL. Overfor Sogn Avis hevdar han likevel at det ikkje var dei 34 underskriftene som vart utslagsgjevande for valet.

– Nei, det var vel eigentleg ikkje det, for det var snakk om å begynna igjen før dette kom i gong, men underskriftene la ikkje akkurat nokon dempar på lysta, smiler Nav-med<\h>arbeidaren.

Han ser optimistisk på ein sesong i 5. divisjon.

– Eg har trua på at det kan bli bra neste år. Me får nokre nye spelarar inn og me skal opp ein divisjon. Eg trur det blir spennande.

– Men kva om dommarstanden set i gong ein underskriftskampanje for å få deg tilbake?

– Eg har dømt i tre år, men fann vel ut at det var meir moro å spela, seier Heggestad.

Eller som han sjølv skriv i pressemeldinga:

«Det er som nemnt artigare å gje dommaren inn med kjeft, enn å vere den som tek imot.»