Syril starta kampen best og spelte seg fram til fleire store sjansar. Utteljing blei det først etter 18 minuttar då Steinar Henjum vart spelt fint fri i midten. Åleine med keeper gjorde måltjuven ingen feil. Heimelaget var oppskriftsmessig i leiinga. Syril burde putta på fleire før kvilen, men det blei med den eine skoringa dei første 45 minuttane, ein omgang heimelaget styrde, men der også Bremanger var farleg frampå ein par gonger.

Fall saman

Fire minuttar inn i den andre omgangen trudde mange at opprykket var klart då Erlend Husabø auka leiinga på ei perle av eit skot frå 25 meter, men slik skulle det ikkje gå. Bremanger reduserte få minuttar etter på straffe og skapte ny spenning i kampen. Heimelaget fall saman og overlet kommandoen til gjestene. Den gesten tok Bremanger godt vare på og netta to gonger til før dommaren bles av. Med tre kampar att å spela ligg Syril framleis godt an til å nå opprykk. Luka ned til Bjørn på tredjeplass er på fem poeng. Dei to møtest til innbyrdes oppgjer i Gaupne i neste runde.