– Resultatet var absolutt ikkje planlagt. Me hadde planar om å vinna kampen, seier kaptein på Veitastrond, Even Kvam.

Seks sekstal

Kombinasjonen av dei tre 6-tala i datoen førekjem berre ein gong kvart 100. år. 666 refererer til det såkalla dyret sitt tal i Johannes openbaring. Der vert ikkje talet sett i samband med noko dato, men ein person eller tittel som representerer Antikrist. Dette har blitt tolka på ulike måtar gjennom historia, og talet er blitt brukt som symbol på det vonde. Det har vore fleire medieoppslag på at kyrkja frykta at satanistar eller andre kunne tenna på kyrkjer og øydeleggja kyrkjegardar denne dagen.

Men på fotballbana under breen på Veitastrond var det berre fotball som stod i hovudet på kamphanane. Og slik gir resultat.

På Leikvoll stadion fekk dei til ein kombinasjon av seks sekstal tysdag kveld. 6. divisjonskampen enda 6-6 den 06.06.06.

Veitastrond-trenar Leiv Inge Fimreite har sett mange fotballkampar i sitt liv. Kampen på tysdag vil han aldri gløyma.

– Det er den merkelegaste fotballkampen eg har sett. Det meste gjekk inn. Til og med vart det mål direkte frå avspark, smiler den røynde trenaren, som også understrekar at resultatet ikkje var planlagt før kampstart.

– Det slo ikkje meg før lenge etter kampen at det var spesielt med eit slikt resultat på denne datoen, seier Fimreite.